Pemerintah tuah lakar netepang abesik proyek strategis nasional (PSN) Bali di daftar 2025, luirne tuah pangalimbak Pelabuhan Perikanan Nasional (PPN) Pengambengan di Jembarana. Lenan teken ento, proyek-proyek gede buka jalan tor Mengwi-Gilimanuk, muwah Bandara Bali Utara tusing macelep di daftar PSN ane paling anyar. 

Kaputusanne ene ngaenang makudang-kudang reaksi uli kramane muwah pelaku ekonomi. Infrastruktur ngelah tongos ane mautama rikala nyokong pangalimbang ekonomi Bali, ane kanti jani nu mase ngandelang sektor pariwisata. 

Yening tusing ada investasi ane gede di konektivitas muwah transportasi, ekonomi Bali riwekas lakar nemu pikobet ane gede. 

Manut buka Dekan Fakultas Ekonomi & Bisnis (FEB) Undiknas Denpasar, Prof. Dr. Ida Bagus Raka Suardana, SE.,MM., tusing ada ne proyek-proyek gede di PSN 2025 lakar ngaenang makelo pemerataan pawangunane di Bali. 

“Jalan tol Mengwi-Gilimanuk muwah Bandara Bali Utara ento infrastruktur vital ane sida nyokong diversifikasi ekonomi Bali. Yening tusing ada makadaduane ento, Bali lakar sumingkin ngandelang pariwisata di Bali Selatan dogen,” munyinne. 

Bali maan kena kontraksi ekonomi -9,3% dugase 2020 krana pandemi Covid-19, nguratiang pangelendok ekonomi daerah ene di widang pariwisata. Yadian jani pangalimbak ekonomine suba ngaluungang, struktur ekonomi Bali enu mase karasayang kuang madiversivikasi. Ento ane makada, tusing adane proyek tol muwah bandara di PSN 2025 karasayang ngae kelangan masa anggon ngalimbakang transformasi ekonomi di Bali. 

Jalan tol Mengwi-Gilimanuk, karancang anggon nincapang konektvitas Bali Barat ajak pusat ekonomi Bali Selatan. Proyek ane lantangne 96,9 kilometer ene kaaptiang sida ngae enggal distribusi barang uli Pulau Jawa ke Bali tur nincapang efisiensi transportasi wisatawan ane nganggon jalur darat. Nanging, ulian tusing macelepne di PSN 2025, proyek ene bisa dogen kabuungang, ane pamuputne ngawinang makelo pangalimbak ekonomi di wawidangan Bali Barat. 

Indike ane patuh buka keto mase karasayang di pangrencana pawangunan Bandara Bali Utara sane satondenne kausulang anggon mucehin tusing papadanne pawangunan ane ada di Bali Selatan muwah di Bali Utara. Jani kuang lebihne 90% pidabdab ekonomi muwah pariwisata Bali enu mase mapancer di Denpasar, Badung muwah Gianyar. Pangalimbak infrastruktur ane ada di Bali Utara karasayang sida dadi pidabdab ane strategis tur luung apang sida ngawangun ekonomi ane mapapdan. Nanging duaning tusing rumasukne proyek ene di daftar PSN, papadan ekonomi di Bali enu dadi pikobet. 

“Yening tusing ada Bandara Bali Utara, distribusi wisatawan muwah investasi ka wawidangan ane ada di badaja tur badangin pulau Baline lakar state makelo. Ene lakar ngae gede tusing papadanne ekonomi ane ada di badelod ajak di wawidangan ane lenan,” paweweh Prof. Raka Suardana. 

Lenan teken ento, tuah abesik PSN ane katerima Bali wantah pangalimbak PPN Pangambengan, kaaptiang sida nincapang widang perikanan di Bali. PPN Pengambengan ngelah potensi ane gede rikala nyokong industri perikanan tangkap ane ngasilang lebihan teken 125 tali ton be sabilang tiban. Nanging, duaning kontribusi sektor perikanan di PDRB Bali ane enu betenan teken 5%, proyek ene karasayang konden sida ngalimbakang ekonomi Bali bandingang teken proyek infrastruktur ane gede buka jalan tol tur bandara. 

Abedikne proyek strategis nasional di Bali ngawetuang makudang-kudang patakon indik daya saing ekonomi daerah ene riwekas. Makudang-kudang pihak nureksain yening pemerintah pusat kuang ngamaang uratian ajak infrastruktur Bali anggon nyokong sektor lenan teken pariwisata. Nanging, ade mase ane nolih ene pinaka galah ane luung anggon buin nitenin pawangunan apang sida ngalimbak tur tusing ngae usak palemahan tur budaya lokale. 

“Riwekas, pemerintah daerah patut sumingkin proaktif rikala ngajuang proyek strategis ane sida ngamaang pakibeh ane gede di krama Bali. Lenan teken ento, mautama mase anggon ngalih wit paridana alternatif apang pawangunan sida stata majalan yadian tusing mastatus PSN” panguntat Prof. Raka Suardana.