Viral 3 Motor Puun Di Tejakula Buleleng, Polisi Negesang Boya Katunjel
beritabali/ist/Viral 3 Motor Puun Di Tejakula Buleleng, Polisi Negesang Boya Katunjel
GOOGLE NEWS
BERITABALI.COM, BULELENG.
Telung unit motor telah puun di Desa/Kecamatan Tejakula, Buleleng. Video puun’ne ento viral di media sosial, ane nyihnayang dadua anak muani ngeling pagerong nolih motorne ane suba masisa tuah besi-besinne dogen. Unduke ene lantas ngedengang las keneh warganet.
Video ane makelonne amenit sia detik ento kaunggah di makudang-kudang akun media sosial buka Facebook, Intagram tur TikTok. Silih tunggilne akun instagram @sesetanpost, ane ngae lengkara: “Katarka motor katunjek ngeling sigsigan! Unduke ene ada di wawidangan Tejakula Buleleng” (katerjemahang nganggo basa Bali)
Marasa las teken unduke ento, begeh pesan warganet ane ngidih ajak pihak kepolisian ane kanti teked ke anggota DPD RI uli Bali, Ni Luh Djelantik, apang nyelehin kasuse ene.
Kasi Humas Polres Buleleng, AKP Gede Darma Diatmika, dugas kakonfirmasi Soma (10/3/2025) negesang yening kebakarane ento ada dugase Redite (9/3/2025) sanja. Iye negesang yening kebakarane ento ane ngaranayang boya sangkaning parilaksanan anak len ane nyelapang morbor motor.
Manut buka apa ane kabakatang dugase kaselehin, tatelu motor ane puu ento tuah Yamaha NMax DK 3799 UAV gelahne Luh Rina Ariani (36), Yamaha Mio Dk 6483 LJ gelah Ketut Sandiawan (38), muwah Yamaha Jupiter Z DK 5809 ABE gelah Ketut Tambir (53). Katarka puun ulian korsleting listrik.
“Ada saksi-saksi ane nolih andus simalu pesu uli headlamp motor NMax. Saksi lantas ngorahang teken kulawarga ane ngelahang motor. Dugas ane ngelahang teked di lokasi, api suba ngedeang tur ngalimbak ke duang motor ane lenan” teges AKP Diatmika.
Kramane ditu mautsaha ngamatiang api nganggon piranti ane ada, nanging motor suba enggalan puun.
“Manut apa ane katuturang baan panakne ane ngelah motor NMax, satondene puun, motore ento maan kaumbah lantas kaparkirang di garasi. Tusing makelo uli ento, rikala iye ada di umah dadongne, iye ningeh ada munyi yening motorne puun,” pawewehne.
Uli panyeleh polisi tusing kabakatang ada parindikan ane karasa nyelapang morbor motor dugase kebakaranne ento. Para korban mase suba nerima paundukane ene dadi kalepetan muwah tusing yatna teken pihak dija-dija.
“Para korban tusing ngelah pikobet ajak nyen-nyen muwah tusing ngelah utang,” panguntat AKP Diatmika.
Editor: Putu Ayu Candra Dewi
Reporter: bbn/bul
Iklan Sponsor
Iklan Sponsor
