Pamasangan CCTV Di Jembatan Tukad bangkung, Sang Wagmi: Tusing Sida Nepasin Unteng Pikobet
beritabali/ist/Pamasangan CCTV Di Jembatan Tukad bangkung, Sang Wagmi: Tusing Sida Nepasin Unteng Pikobet
GOOGLE NEWS
BERITABALI.COM, BADUNG.
Pamasangan kamera pengiwas (CCTV) di Jembatan Tukad Bangkung dadi pidabdab nepasin ulah pati ane ngawetuang panampen uli ahli kesehatan jiwa Prof. Dr. dr. Cokorda Bagus Jaya Lesmana, S.Ked, Sp.KJ (K), MARS.
Guru Besar Universitas Udayana ene nampenin yening paundukan CCTV ne sida ngamaang rasa kapok di atengan anae, utamanne anake ane inget teken awakne kaiwasin.
“Pamasangan CCTV mula sida ngamaang rasa kapok keto mase sida ngae anake buin minehin satondene ngalarang ulah pati, utamanne yening iye inget yening paripolahne kaiwasin,” teges Prof. Cok Bagus, Soma (7/4/2025).
Baca juga:
Ipian Kadek Melly Suba Ilang Di Amerika, Kulawarga Ngarepang Sawane Pang Enggal Mulihanga
Manut dane, kamera pengiwas sida kaanggon nepasin paripolan ane impulsif, nanging tusing sida ngenen unteng pikobete ane ngaenang anake milihin ngamatiang dewek.
“Di makudang-kudang kasus, krana ada kamera pangiwas sida ngamaang rasa kaiwasin ane sida nepasin paripolah impulsif, nanging boya sida ngenen unteng pikobetne. CCTV tuah sida nepasin uli widang fisik keto mase akses, boya sida ngenen unteng pikobet psikologis ane dadi krana anake makita ulah pati,” tegesne.
Prof. Cok Bagus nguratiang yening gangguan mental buka depresi, rasa inguh ane baat, utawi pikobet hidup tusing sida kapragatang tuah malarapan pangiwas uli kamera dogen.
Iye mase nuekang kautaman sistem pangiwas aktif tur respons ane enggal uli petugas, apang intervensi sida kalaksanayang satondene kasepan.
“Efektivitas CCTV mase lakar nganutin sistem pangiwas aktif tur respons enggal uli petugas. Yening ada pangiwasan real-time tur petugas sida enggal nyagjagin rikala ada anake ane maparipolah melenan, pastika sida nepasin galah anake ngalarang parilaksana ane boya-boya tur ngawi sengkala ane gedenan,” tegesne.
Buin johan, manut buka dane, solusi panepas ulah pati sapatutne boya tuah nuek di tongos ulah pati dogen, nanging mase di pidabdab ane sida ngawantu anake mucehin pikobet psikologisne.
“Iraga patut ngawangun sistem ane tusing tuah nepasin anake ane sida ngalarang paripolah di tongose ento dogen, nanging mase ngawantu iye mucehin pikobet ane karasayang. Panepas ulah pati tuah marupa swadharma ajak makejang,” panguntat Prof. Cok bagus.
Editor: Putu Ayu Candra Dewi
Reporter: bbn/tim
Iklan Sponsor
