Gubernur Bali Wayan Koster mesuang Surat Edaran (SE) Nomor 08 Tahun 2025 ngindikin Tatanan Bagi Pemedek/Pengunjung Saat Memasuki dan berada di kawasan Suci Pura Agung Besakih Selama Pelaksanaan Karya Ida Bhatara Turun Kabeh. 

Karya Ida Bhatara Turun Kabeh warsane jani ene lakar kalaksanayang rikala 12 April kanti 3 Mei 2025. Di SE’ne ento kasobyahang pidabdab ngupapira tur nyaga karesikan, kaluihan, kasucian tur kaagungan wawidangan suci Pura Agung Besakih kagelarang pangeling-eling buka kene : 

1. Pelaku UMKM/para dagange tusing kabaang pesan maadepan di bibih jalane, tuah kabaang maadepan malarapan ngawigunayang kios lan los ane suba kasayagayang. 

2. Pelaku UMKM ane ngawigunayang kios tur los tusing kabaang pesan maadepan, nyayagayang, tur ngawigunayang tas kresek, pipet plastik, styrofoam, ajak produk/ineman kemasan plastik. 

3. Pelaku UMKM ane ngawigunayang kios tur los tusing kabaang pesan ngutang mis tusing di tongosne, ngelah swadharma naya karesikan soang-soang malarapan ngalaksanayang pidabdab pangelola mis ane mabasis sumber, milah milihin mis organik, ane tusing organik, anorganik, tur residu, ajak ngupapira keasrian genah. 

4. Pemedek tusing kabaang pesan ngaba/ngawigunayang tas kresek, pipet plastik, styrofoam, ajak produk/inem-ineman kemasan plastik, manut buka Peraturan Gubernur Bali Nomor 97 Tahun 2028. Ane dadi panyilur, apang pemedek ngaba tumbler. 

5. Pemedek ane ngaba sarana upakara ane suba kaaturang/lungsuran, tusing dadi ngutang lad-ladan lungsurane di Kawasan Suci Pura Agung Besakih, tur ngelah swadharma ngaba mulih buin lad lungsurane. 

6. Pamedek tusing kabaang ngutang mis sing anut teken tongosne di wawidangan suci Pura Agung Besakih tur ngelah swadharma ngaba mulih makejang mis-mise ento. 

“Ane kapertama, iraga patut trepti jani Bali patut seken-seken resik uli mis pedagang, krama, tusing dadi nganggo tas kresek, suba lantas keto bungkus plastik ane konden makejang pesan ane nyak nuutang, nanging kaaptiang uli warsa ka warsa patut ngalimbak, pedagang di Karangasem tusing buin kabaang ngadep inem-ineman ane nganggo kemasan plastik,” munyinne Koster dugase matemu pers, Buda (2/4/2025) di Rumah Jabatan Jaya Sabha, Denpasar. 

“Ngidih tulung pak Kepala Badan apang kalaksanayang sosialisasi treptiang tusing dadi maadepan inem-ineman kemasan, Tusing ada buin ane lakar katreptiang, jeg treptiang tegesang nak suba tusing dadi,” tegesne. 

Lenan teken ento Kepala Badan Pengelola FKSPA Besakih I Gusti Lanang Muliarta mase negesang yening razia plastik lakar stata kalaksanayang di Manik Mas. 

“Yening di dagang-dagangnge, suba duang tiban iraga tonden sida di imbauan, asanne iraga lakar maksa abedik apang plastik tusing kaaba, tiang mase sebet pesan di beten suba katreptiang pamedek tangkil, jeg tuun-tuune ngaba plastik krana suud mablanja,” munyinne.