Dadi media online kapertama di Bali, Beritabali.com stata ngembasang pidabdab kreatif tur inovatif. Ane jani, tim Beritabali.com ngembasang rubrik kartun mamurda Tut Katos, ane sida dadi wangun anyar rikala nyobyahang pabesen sosial ajak publik Bali. 

Manut buka ane ngae, I Ketut Adi Sutrisna ane sai kakaukin Centong, sapatekan rubrik ene boya ja tuah marupa pidabdab inovasi media digital dogen, nanging mase lekad ulian rasa iwas tur inguh ajak makudang-kudang fenomena sosial di Bali ane nyumingkin ruwet. 

“Makolaborasi ajak kartunis I Putu Krishna Coma, rubrik kartun ene lakar dadi kritik sosial ajak makudang-kudang parindikan ane ada di Bali. Kritik uli kartun tiang ajak makejang ngaptiang dadi utsaha ane efektif keto mase dadi pangalila keneh kramane. Wekasan kartun Tut Katos lakar ada abulan cepok di website tur media sosial Beritabali.com.” teges Centong ane mase dadi manajer bisnis tur kerjasama Beritabali.com. 

Anak ane ada di visualisasi Tut Katos ento tuah I Putu Krishna Mayudata, kartunis nguda uli Bali ane suba ngelah makudang-kudang pajalan ane lantang di jagat seni visual. Lulusan SMA ene suba kasub pesan di jagat kartun tur animasi, ngawit uli dadi kartunis, translator, kanti dadi ilustrator di Bog-Bog Bali Cartoon Magazine tur HNS Studio Bali. 

Iye mase taen dadi jayanti harapan pacentokan karikatur Bali Mandara, ngidaang macelep di 10 besar pacentokan komik Hari Bahasa Bali, tur marengin proyek animasi ane katujuang teken Bluebird Taxi tur KPU Bali. Karya-karya kartunne suba bek pesan ngiasin makudang-kudang media sosial di Bali. 

Lenan teken ento, tokoh Tut Katos muatang filosofi lokal ane dalem. Adan Ketut, ane dadi silih tunggil pahan uli adan tokohe ene, nuek teken anak ane kaping pat ane di tradisi adan Bali-dadi adan ane jani suba arang pesan kadingehang krana ada program Keluarga Berencana dua anak cukup uli pemerintah. 

Di parindikan ane lenan, kruna Katos di basa Bali mateges “keras” tur “kukuh”, nanging boya nuek dadi paneges ane kaon. Di konteks ane ene, Katos nyihnayang rasa egar angabar-abar ane gede tur kukuh anggon ngukuhin adat, tradisi tur budaya Bali apang sida stata ajeg tur lestari di tengah ius modernisasi tur transformasi digital. 

Rubrik Tut Katos lakar ada abulan cepok di kanal websire tur media sosial Beritabali.com, malarapan pangapti dadi tongos kritik sosial ane raket teken kramane, bek pesan suksmanne, nanging enu mase ngidaang ngibur tur paek teken budaya Bali.