Manggala DPD Gerindra Bali, Made Muliawan Arya utawi De Gadjah, nyanggra sapangrauh Gubernur Bali sane kaadegang, I Wayan Koster, ring genahnyane ring Denpasar rikala Soma (10/2/2025). 

Ring patemon punika nyobyahang indik makudang-kudang isu strategis sane mapaiketan ring pawangunan Bali kapungkur wekas nyujur pelantikan manggala daerah sane kapisaratang ring tengan sasih Februari puniki.

Ring patemone puniki, De Gadjah nguncarang rahajeng majeng ring Koster duaning sampun sida manados jayanti ring Pilgub Bali 2024. Dane mapangapti mangda makasami semaya rikala kampanye sane sampun kasobyahang ring krama sida kalaksanayang.

"Titiang sareng sami ngaturang rahajeng antuk pikolih jayanti Dane miwah pangaptin titiang mangda sami semaya rikala kampanya sane sampun kasobyahang ring ajeng krama sida kalaksanayang becik-becik,” baos De Gadjah. 

Siosan ring punika, De Gadjah naler negesang ngeninin indik Partai Gerindra sayaga pacang nyarengin, kebijakan-kebijakan Koster selami program sane kamargiang punika anut ring visi Presiden miwah pikarsan krama.  

“Titiang sareng sami gerindra sayaga nyarengin yening program-program dane pro-rakyat manut ring program bapak Presiden,” pawewehnyane. 

Selanturnyane, dane naler mungkah pangremba yening wenten program utawi unteng pikayun sane durung kasobyahang olih pihak dane rikala kampanye miwah karasa relevan ring panglimbak Bali. 

Siosan ring mligbagang indik pangremba politik miwah pawangunan, patemone puniki naler nuekang makudang-kudang pikobet krusial ring Bali. De Gadjah maosang silih tunggil isu sane mautama sane patut kauratiang pisan, inggih punika indik leluhu, alih fungsi lahan, miwah kawentenan adat lan budaya sane patut kawerdiang, rumasuk ring pangelantur sistem subak pinaka warisan pertanian khas Bali.

Ring galahe punika, De Gadjah naler negesang yening Partai Gerindra Partai Gerindra sutindih nyarengin pangenter Koster ring periode kaping kalih, sakemaon wenten naler pisaratne gubernur sane sampun kajantenang punika patut naler sutindih ring krama, Presiden RI Prabowo Subianto miwah palemahan naler budaya Bali. 

“Titiang sobyahang yening Gerindra wantah partai sane sutindih, sakemaon yening Pak Koster sida naler sutindih ring krama, Bapak Presiden miwah Bali,” baosnyane.