RSUD Buleleng Nyiagayang 251 Nakes Dugas Nyepi Anggon Pelayanan Darurat
beritabali/ist/RSUD Buleleng Nyiagayang 251 Nakes Dugas Nyepi Anggon Pelayanan Darurat
GOOGLE NEWS
BERITABALI.COM, BULELENG.
Liun wilanganne 251 tenaga kesehatan (nakes) kasiyagayang di RSUD Buleleng dugas Rahina Nyepi Caka 1947. Makejang nakes ento suba sayaga ngamaang pelayanan ane mawirasa gawat darurat.
Dirut RSUD Buleleng dr Putu Arya Nugraha dugas Buda (26/3) ngorahang, panyatusan nakes ento kasiyagayang uli Pengurupukan petengne ane dadi mase orahang dugas Sukra (28/3) peteng kanti ngembak geni di dina Redite (30/3). Iye makejang ento kadumin telung sift, luirne semengan, tengai tur peteng.
“Yadian kadum telung sift, tusing ada ne mulih. Iye jak makejang nu mase standby 24 jam. pasien ane gawat darurat patut stata katerima,” munyinne.
Yening dugase Nyepi ada pasien ane patut maan penanganan bedah kanti ngalekadang caesar, pelayanan ento kategesang dr Arya enu stata sida kabaang. Ningetin pihakne mase suba nyiyagayang makudang-kudang dokter bedah. Keto mase ajak pasien ane patut karujuk ke RS Prof Ngoerah Denpasar mase sida kalaksanayang, yening suba ada makoordinasi ajak pecalang di desa adat ane lakar kaentasin.
“Dadinne tindakan medis, mula tusing ngidaang makejangne ngamilunin tradisi Nyepi, krana lakar ada paundukan ane gawat darurat. Nanging tiang ajak makejang mase patut makoordinasi ajak pecalang di desa adat ane suba kaentasin,” munyinne.
Baca juga:
De Gadjah Buin Ngamanggalanin Pertina Bali
dr Arya mase tusing nepasin rikala pangerupukan petengne ketahne ada dogen pasien ane matatu tur cedera. Intalasi Gawat Darurat (IGD) sayaga ngamaang pelayanan ajak pasien ento. Nanging dr Arya mabesen apang kramane luungne pariyatna.
Ngingetin pikobetne tusing ada di pelayanan di rumah sakit, nanging jaminan kesehatan ane biasanne tusing sida katanggung baan BPJS kesehatan, krana katureksain dadi kapelihan iraga soang-soang.
“Yen dadi eda bes kaliwat panyanggrane. Laksanayang apang trepti tur madeng-adengan apang tusing kanti matatu,” tegesne.
Editor: Putu Ayu Candra Dewi
Reporter: bbn/rat
Iklan Sponsor
