Gubernur Nusa Tenggara Barat, Lalu Muhammad Iqbal ngarembug ajak Direktur Utama MGPA Priandhi Satria, parindikan pidabdab MGPA rikala ngelola Pertamina Mandalika International Circuit amoneanne ne. 

Di pabligbaganne ento ngajak Gubernur NTB, Priandhi negesang makudang-kudang pidabdab rikala Calender Of Event 2024, ngindikin pawigunan sirkuit ane wilanganne 268 dina, ane liun parikramanne ento 277 parikrama. Lenan teken ento kategesang mase ngindikin Calendar Of Event 2025 ane kanti jani suba ade ane nga-booking event ane liunne 48 dina tur wilangan parikramanne 56 parikrama. 

Ngalantur buin Priandhi negesang ada parindikan ane mabinayan di warsa 2025 bandingang teken warsa ane suba liwat. Di 2025, lakar ada paweweh buin dadua event roda papat, ane kasengguh GT World Challenge Asia muwah Porsche Carrera Cup Asia. Detilne, Priandhi negesang pikamkam event international roda papat, GT World Challenge Asia 2025 ane lakar kalaksanayang di Pertamina Mandalika International Circuit di tanggal 9 kanti 11 Mei 2025 ane lakar teka. 

Di patemonne ento, kategesang yening event GT World Challenge Asia 2025 di Sirkuit Mandalika marupa paigum kolaborasi ane lantang ajak SRO Motorsports Group ane suba raket uli 2022. Panglaksanan event ene dadi cihna daya tarik Pertamina Mandalika International Circuit di kalangan motorsport global. 

Event GT World Challenge Asia 2025 di Sirkuit Mandalika lakar kabarengin ajak kuang lebihne 30 kendaraan luxury sports car ane luirne kabarengin ajak 8 merk kendaraan cara Audi, BMW, Chevrolet, Ferrari, Lamborghini, Mercedes-AMG, Nissan muwah Porsche. Suba lantas keto, pembalap ane lakar macu adrenalin di sirkuit ane lantangne 4,31 kilometer ene liunne 40-60 diri (dadua di soang-soang mobil) ane mawit uli 21 negara tur bareng di 33 tim. Di seri Mandalika Circuit, minabang ane lakar nekain wilanganne 30 mobil GT3 uli makudang-kudang tim ane suba kasub buka Absolute Racing, Origine Motorsport, Phantom Racing ajak makudang-kudang tim ane kasub lenan. 

Di patemonne ngajak Gubernur NTB ento, Priandhi mase negesang indik pikamkam muwah pauwahan infrastruktur ajak paweweh pamasangan fasilitas elektronik di Sirkuit Mandalika anggon nyokong pajalan event balap mobil roda papat kelas international dibeten FIA homologasi grade-3. 

Mamiq Iqbal, ane biasa kakaukin Gubernur NTB ene antusias pesan nyanggra event GT World Challenge Asia 2025, Gubernur ngelah pangrencana lakar ngulemin welcoming dinner para pembalap GT World Challenge Asia 2025 muwah SRO pinaka promotor balap. Rikala kalaksanayang event balape ene, lakar kabaang cendera mata ane katujuang tuah para jayanti anggon nincapang panekan para jayantine di Lombok, NTB Indonesia. 

Malarapan panyokong uli Pemerintah Provinsi NTB, kaaptiang event GT World Challenge Asia 2025 sida dadi silih tunggil event balap mobil ane paling gedena di Pertamina Mandalika International Circuit tur mase lakar ngamaang pengalaman ane luih tur tusing sida kaengsapang ajak SRO pinaka promotor balap tur mase pembalapne. 

Patemone ene nandain kateleban makadadua pihak rikala ngalaksanayang international ane kapertama di Pertamina Mandalika International Circuit. Gubernur NTB ngamaang makudang-kudang panampen ajak MGPA. Silih tunggilne ngalimbakang museum di Sirkuit Mandalika ane kabekin ban makudang-kudang koleksi motor muwah mobil ane mase sida kapenekin di jalan sirkuit, panampene ene maan panyanggra ane positif uli MGPA. 

Pabligbaganne ene kasineb baan mafoto ajaka makejang tur MGPA mase ngamaang cendera mata marupa Calendar Of Event 2024, Calendar Of Event 2025, ajak plakat layout Pertamina Mandalika International Circuit. Tusing engsap, MGPA mase nguncarang suksma malarapan panyokong ane suba kabaang pemerintah Provinsi Nusa Tenggara Barat di makudang-kudang parikrama di warsa 2025. 

Priandhi ngawehin, “Event international lakar ngae Sirkuit Mandalika buin sida nekaang pembalap, pamilet, wisatawan lokal miwah international ngabekang. Sapatekan anake ane demen ajak otomotif, keto mase uli makudang-kudang pemberitaan di makudang-kudang media lokal tur media asing ane pastika lakar sida nyihnayang Mandalika, Lombok, NTB tur Indonesia di jagate.”

“Kaaptiang, malarapan parikrama buka kene sida nincapang sapetekan turis lokal muwah asing ane sayan nincap. Indike ene manut teken arahan uli induk holding tiang ajak makejang ane kaadanin Injourney Holding, pinaka holding di beten Kementerian BUMN di widang pariwisata tur panyokongne, ane state ngukuhang swadharmanne rikala nuludang panglimbak pariwisata ane ngalantur di Indonesia,” sasobyahang Priandhi. 

“Pertamina Mandalika International Circuit tusing ja tuah gelah MGPA, nanging mase gelah Indonesia, ene patut state iraga gedenang beneh-beneh, glorifikasi nindihin Indonesia. Mai ajak makejang ngutsahayang pesan ngalimbakang Indonesia uli makudang-kudang parikrama di Pertamina Mandalika International Circuit”, sineb priandhi Satria.